امامعلی رحمان، رئیس جمهوری تاجیکستان وارد پاکستان شده است. رسانه‌های پاکستانی گزارش دادند که علاوه بر موضوعات دیگر اوضاع افغانستان در محور گفتگوهای روسای دو کشور قرار دارد.
این سفر دو روزه آقای رحمان به پاکستان با اهمیت تلقی شده است.
عبدالفتاه شریفزاده، سخنگوی رئیس جمهوری تاجیکستان گفته است که در جریان این دیدار درباره توسعه روابط دوجانبه در بخش‌های اقتصاد، اجتماع و انرژی بحث خواهد شد.
این نهمین دیدار رییس جمهوری تاجیکستان از سال ۱۹۹۴ از پاکستان است. سال گذشته نیز دو و نیم ماه پیش از تسلط مجدد طالبان در افغانستان، رحمان به پاکستان سفر کرد.
گفته شده است که دو رییس جمهور خواهان تشکیل یک دولت فراگیر با حضور تمامی جناح های قومی و سیاسی در افغانستان هستند.
اسلام آباد و دوشنبه پس از حاکمیت طالبان در بیش از یک سال گذشته، نگران شکل‌گیری دوباره تروریزم در افغانستان است و اعلام کردند که اوضاع در افغانستان را تحت نظارت دارند.
این نهمین دیدار رییس جمهوری تاجیکستان از سال ۱۹۹۴ از پاکستان است
این دو کشور همسایه می گویند که مخالفان افراطی و تندرو از افغانستان وارد خاک تاجیکستان و پاکستان می شوند.
تاجیکستان پیشتر خواهان ایجاد یک کمربند امنیتی در اطراف افغانستان شد.
در حاشیه نشست رهبران کشورهای عضو شانگهای در سمرقند، در سپتامبر امسال نیز امامعلی رحمان با شهباز شریف، نخست‌وزیر پاکستان دیدار کرد.
اوضاع افغانستان یکی از محورهای گفتگوهای دو کشور بوده است. از نخستین روزهای بازگشت طالبان به قدرت، دولت تاجیکستان از شیوه حکومت طالبان و «نقض حقوق تاجیکان» افغانستان انتقاد می‌کند.
حالا چنین به نظر می‌رسد که در برخی مسائل مربوط به افغانستان، تاجیکستان و پاکستان به دیدگاه‌های مشترک رسیده‌اند.
تاجیکستان در آینده از طریق افغانستان می‌خواهد به پاکستان انرژی صادر کند. پاکستان نیز می‌خواهد با همسایه‌‌های شمالی افغانستان، بویژه با تاجیکستان روابط دوستانه داشته باشد.
