عبدالله عبدالله رییس شورای عالی مصالحهی ملی، چاشت روز گذشته (سهشنبه، 2 جدی) پس از ملاقات با امام علی رحمان رییس جمور تاجیکستان، با رسانهها صحبت کرد.
رییس شورای عالی مصالحهی ملی به رسانهها گفت: نزدیک به دو و نیم ساعت با امام علی رحمان رییس جمهور تاجیکستان ملاقات مفصل و همهجانبه داشتیم که در این ملاقات در رابطه به تمام موضوعات مرتبط به دو کشور به ویژه در بارهی روند صلح، همکاریهای دوجانبه میان افغانستان و تاجیکستان بحث و تبادل نظر کردیم.
عبدالله عبدالله بیان داشت که در دیدار با دیگر مقامهای جمهوری تاجیکستان نیز روی روابط دوجانبه، روند صلح و حمایت تاجیکستان از صلح افغانستان ملاقاتهای مفید و سازنده داشتیم.
رییس شورای عالی مصالحهی ملی به رسانهها گفت: جمهوری تاجیکستان همیشه حامی پروسه صلح در افغانستان بوده و در این راستا تجربهی موفق دارد. از رییس جمهور تاجیکستان تقاضا کردم که تجربهی خود شان را با ما شریک سازند، امروز تاجیکستان در صلح به سر میبرد و به ترقی دست یافته است. نکته نظرات نیک و سازندهی را به بحث گرفتیم.
عبدالله عبدالله افزود: رییس جمهور تاجیکستان به این عقیده است که صلح و آرامی در افغانستان به معنای صلح، آرامش و توسعه در کل منطقه است. در این راستا وعده سپردند که در عرصههای که تاجیکستان بتواند در تبادل نظر با سایر کشورها، کشورهای که بر صلح افغانستان تأثیرگذار استند، همکاری جدی میکند. به عنوان یک شهروند و رییس شورای عالی مصالحهی ملی افغانستان، از تعهد، تداوم همکاری، حسن نظر و حمایت همهجانبه کشور دوست و برادر (تاجیکستان) قدردانی میکنم.
رییس شورای عالی مصالحهی ملی در ادامهی صحبتهای خود از مهمان نوازی مقامات و مردم جمهوری تاجیکستان سپاسگزاری کرد و افزود: امید است که با استقرار صلح و امنیت در کشور، ما شاهد شگوفایی مردمان این منطقه باشیم و روابط و همکاریها، هرچه بیشتر میان کل منقطه و افغانستان و تاجیکستان گسترش یابد.
عبدالله عبدالله برای جلب حمایت و اجماع منطقه ای صلح تا به حال کشورهای ایران، پاکستان نیر سفر کرده است.
خبرگزاری بخدی
