وزارت امور خارجه کشور از اجرایی شدن موافقتنامه استرداد مجرمین میان افغانستان و تاجیکستان خبر داده میگوید که قرار است امروز 80 نفر از شهروندان افغانستان که در تاجیکستان زندانی هستند، برای ادامه محکومیت شان به کشور انتقال داده شوند.
این وزارت با نشر اعلامیهای گفته است که توافق روی انتقال اين افراد، اخيرن در ديدار ميان صلاح الدين ربانی، سرپرست وزارت خارجه و امام علی رحمان رييس جمهوری تاجيكستان در دوشنبه بدست آمده بود.
در اعلامیه وزارت امور خارجه آمده است که آقای ربانی در حاشیه نشست وزیران خارجه آسیای مرکزی با آقای امام علی رحمان رئیس جمهور تاجیکستان خواستار اجرایی شدن موافقتنامه استرداد مجرمین میان دو کشور و انتقال زندانیان افغان به افغانستان گردیده بود.
در همین حال آقای رحمان نیز با استقبال از این درخواست وزیر خارجه افغانستان، دستور فراهم گردیدن تسهیلات لازم از سوی دولت این کشور در این زمینه را داده است.
در اعلامیه آمده است که قرار است هشتاد نفر از شهروندان افغانستان که در تاجیکستان زندانی هستند، امروز ساعت هشت و نیم صبح برای ادامه محکومیت به کشور انتقال داده شوند.
تاکنون مشخص نیست این افراد به چی جرم هایی در کشور تاجکستان زندانی هستند.
خبرگزاری بخدی
