دومین نشست گروه مشترک انسجام برای تطبیق پروژه راه آهن ترکمنستان، افغانستان و تاجیکستان چندی پیش در شهر دوشنبه، پایتخت تاجیکستان برگزار شد.
دراین نشست، هیات کشورهای افغانستان، تاجیکستان و ترکمنستان حضور داشتند و پس از بحث و گفتگو به تفاهم رسیدند که کشور تاجیکستان کار پروژه راه آهن از دو مسیر اصلی و فرعی را همزمان آغاز کند.
وزارت امورخارجه کشور با نشر اعلامیه ای گفته که در این نشست، مسیر اتامراد، امام نظر، آقینه، اندخوی، شبرغان، مزارشریف، خلم، قندوز، شبرغان، پنج پایان، کلخوزآباد” به طول ۶۳۵ کیلومتر به حیث مسیر اصلی و مسیر پیشنهادی تاجیکستان، بشکینت، کلدار، حیرتان و قایبن دگ جنکشن ترکمنستان به طول ۱۶۰ کیلومتر به حیث مسیر فرعی پروژه تائید شده است.
در این نشست از جانب افغانستان نورگل منگل، معین تخنیکی وزارت فوائد عامه، نماینده کشور تاجیکستان گنجل زاده، معین اول وزارت نقلیات و آقای گلدی یوف به نمایندگی از وزارت ترانسپورت راه آهن ترکمنستان به شمول نمایندگان وزارت های امور خارجه این کشور ها اشتراک کردند.
سران کشورهای افغانستان، ترکمنستان و تاجیکستان در حاشیه نشستی در ماه جون سال گذشته بر سر احداث خط آهن توافق کردند و توافقنامه ای نیز در این زمینه امضا شد.
پس از آن٬ نمایندگان سه کشور نشست های مختلفی را برای آغار عملی کار احداث راه آهن و بحث روی این پروژه برگزار کردند.
گفته می شود سومین نشست هیات های سه کشور در شهر کابل برگزار خواهد شد.
آغاز کار احداث خط اهن برای وصل کردن راه های ترانسپورتی و ترانزیتی ، ایجاد بازارها و عرضه خدمات اقتصادی میان افغانستان، تاجیکستان و ترکمنستان از اهمیت زیادی برخوردار است.
احداث خط آهن سه جانبه از پروژه های بزرگ زیربنایی منطقه به شمار می رود.
با این حال وزارت خارجه افغانستان گفته است، در آخرین نشست در شهر دوشنبه، پایتخت تاجیکستان توافق کردند که تاجیکستان تمویل مالی مسیر فرعی را بر عهده داشته باشد و افغانستان نیز ناظر تخنیکی این پروژه خواهد بود.
در اعلامیه این وزارت به نقل از هیأت تاجیکستان گفته شده که، مسیر فرعی پروژه راه آهن با هزینه مالی ۲۴۰ میلیون دالر امریکایی و در جریان سه سال تکمیل خواهد شد.
خبرگزاری بخدی
